ახალი ამბები

Apple Pencil სტილუსის ამჟამად არსებული ვერსია გახლავთ ინსტრუმენტი, რომელიც სხვადასხვა ოპერაციის სწრაფად შესრულების საშუალებას იძლევა. წინა მოდელთან შედარებით ახალი ვერსიის მთავარი სიახლე გახლდათ ორმაგი დაჭერის შესაძლებლობა, რომელიც მთელ რიგ ფუნქციებზე წვდომას აძლევს მომხმარებელს. მიუხედავად იმისა, რომ ამ ელემენტის მომართვა-რეგულირება შესაძლებელია, მას მხოლოდ ოთხი პარამეტრი აქვს. მცირე ხნის წინ დარეგისტრირებული პატენტი კი იმაზე მიუთითებს, რომ სამომავლო Apple Pencil-ის შესაძლებლობები მნიშვნელოვნად გაფართოვდება.

საუბარია დოკუმენტზე, რომელიც მცირე ხნის წინ გამოჩნდა ამერიკის ინტელექტუალური საკუთრების სააგენტოს ვებ-გვერდზე. გამოქვეყნებული ინფორმაცია მიგვითითებს, რომ მომდევნო თაობის სტილუსს ექნება სენსორული სივრცე, რომელიც გამოიყენება მომხმარებლის სხვადასხვა ჟესტის ამოცნობისთვის, მათ შორისაა სამმაგი შეხება და ე.წ. swipe ფუნქცია. შედეგად სამუშაო პროცესი Apple Pencil-ის გამოყენებით გახდება გაცილებით მრავალფეროვანი ამჟამად არსებულ სტილუსთან შედარებით.

მომდევნო თაობის სტილუსში სიახლე შესაძლოა იყოს მოწყობილობის ბოლო ნაწილში ინტეგრირებული კამერა. მისი წყალობით მომხმარებლები შეძლებენ ჩაიწერონ ნებისმიერი სიმბოლო პრაქტიკულად ყველა ზედაპირზე და შემდეგ დაამუშავონ iPad-ზე. პატენტში ნახსენებია სხვა სახის შესაძლებლობებიც, მაგალითად – მიკროფონი, დინამიკი, დამატებითი ღილაკები, ბიომეტრიული სენსორი და ტრეკპადიც კი. გარდა ამისა, Apple Pencil-ს შესაძლოა ჰქონდეს ტაქტილური უკუკავშირის ფუნქცია, რისი წყალობითაც iPad-ზე სტილუსით ხატვის პროცესი ქაღალდზე ხატვის ბუნებრივ პროცესთან მიმსგავსებული იქნება.

უნდა აღინიშნოს, რომ დაპატენტებული ფუნქციები მომდევნო თაობის სტილუსის შესაძლო მოდიფიკაციებია, ამიტომ დიდი ალბათობით ყველა მათგანი არ იქნება წარმოდგენილი ბაზარზე გამოსულ მოწყობილობაში.

სტატია მომზადებულია Scroll.Ge -ს მიერ

კომპანია Intel-მა უკვე დაიწყო X^e DG1 დისკრეტული ვიდეო დაფების გავრცელება პროგრამული უზრუნველყოფის მწარმოებლებს შორის. შედეგად დაფების შესახებ მეტი ინფორმაცია ხდება ცნობილი, რადგანაც ადაპტერების ტესტირებების შედეგად ინფორმაცია ხვდება ისეთ ბაზებში, როგორიცაა Geekbench 5 ბენჩმარკი.

ამჯერად ახალი ინფორმაცია გამოჩნდა SiSoftware-ის ბაზაში, სადაც მოხდა მე-12 თაობის არქიტექტურის მქონე ამაჩქარებლის ტესტირება. ამაჩქარებელი წარმოდგენილია 96 EU-თი, რომლებიც მუშაობენ 1,5 გჰც-ზე (სავარუდოდ DG1 მოდელი). ტესტირების შედეგები ადასტურებს, რომ ადაპტერს აქვს 768 გამომთვლელი ბირთვი. გატესტილ ნიმუშს 3 გბ მეხსიერება აქვს, თუმცა ეს არ ნიშნავს იმას, რომ სერიულ პროდუქტსაც იდენტური მახასიათებლები ექნება.

ამაჩქარებელი – ეს გახლავთ დესკტოპ ვერსიად სახეცვლილი ინტეგრირებული მობილური გრაფიკული ადაპტერი. ამაზე მიუთითებს OpenCL ტესტი, რომელშიც იგი განისაზღვრა, როგორც „მე-12 თაობის მობილური გრაფიკული“ კონტროლერი. აქედან გამომდინარე, X^e LP ჩიპზე აგებული DG1 მოდელი საწყისი დონის ვიდეო დაფაა.

ადაპტერი DG2 საშუალო სეგმენტში მოხვედრის კანდიდატია, რადგანაც მოსალოდნელია, რომ მას 2048 ბირთვი ექნება. მიუხედავად იმისა, რომ Intel-ის გრაფიკული ადაპტერების შესახებ ცნობები რეგულარულად ხმაურდება, ამჟამად უცნობია რომელი სეგმენტის განვითარებაზეა კომპანია ორიენტირებული მიმდინარე წელს.
სტატია მომზადებულია Scroll.Ge -ს მიერ